تم النشر في السبت, 14 ديسمبر 2013 , 11:11 صباحًا .. في الأقسام : أهم الأخبار , من الأرشيف

اسماعيل ياسين تحاوره تحيه كاريوكا قبل 61 سنه

اسماعيل وابنه

 

 

سين وجيم بين تحية كاريوكا واسماعيل ياسين

تحية – اسمك ايه ؟

اسماعيل : نا نا و تا تا – ليه كفى الله الشر ؟ هو انا عملت حاجة ؟

تحية مفيش حاجة بس عايزة اعرف اسمك علشان اعمل المحضر

اسماعيل: وقد ظهرت عليه علامات الانزعاج الشديد , محضر .. ليه؟ .. هو انتي اشتغلت باشاويش في نقطة البوليس ؟

تحية : من فضلك مفيش وقت عشان الهظار ..انا بستجوبك باسم (الكواكب)

اسماعيل : يا خبر زي بعضه ..اوعى تساليني الاسئلة اللي بتخوف … ياماما .!

تحية _ عمرك كام سنه .؟

اسماعيل _ وعايزة تعرفي عمري ليه .؟

تحية وهي تضرب المنضدة بيدها وتصيح : هو كل سؤال راح تعلق عليه ! انت تجاوب وبس ..فاهم ؟

اسماعيل – ايوه …ايوه …فاهم ..يا ساتر يا رب , عمري 39 سنة

تحية : قبل ان تبدا حياتك الفنية كنت بتشتغل ايه ؟

اسماعيل : كنت بشتغل عاطل !

تحية : كيف هويت الفن ؟

اسماعيل : هويت الفن ككل فنان …لان الفنان بيطلع على طول فنان من غير مقدمات ولا مؤخرات 1

تحية : مؤخرات يعني ايه ؟

اسماعيل : انا عارف ؟ انا لا فاهم مقدمات يعني ايه ولا مؤخرات يعني ايه

تحية : كان في جيبك كام وقت ما اشتغلت ؟

اسماعيل : كان في جيبي 13 قرش ..!

تحية : انت راح تكذب على الصحافة ؟

اسماعيل : ان شاء الله اطفح الفلوس اذا كان معايا اكثر من13 قرش

تحية : هل تعتقد ان لفن المونولوج هدفا اجتماعيا ؟

اسماعيل : (متحمسا) بكل تاكيد ..فالمنلوج ..فالمنلوج الى جانب رسالته كوسيلة من وسائل التسلية و الترفيه , له هدف اجتماعي …فان موضوع المنلوج ينتقد بعض عيوبنا ويعالج مشاكلنا , وانا شخصيا احرص على ان تكون كل منولوجاتي ذات هدف اجتماعي , ولو راجعت هذه المنلوجات لوجدت فيها عظة وعبرة الى جانب الفكاهة الحلوة البريئة .

تحية : بماذا تعلل قلة عدد المنولوجست التاجحين عندنا ؟

اسماعيل : (على الفور) اعللخ بان هذا النوع من الفن يتطلب مواهب واستعداد قل ان تتوفر في كل فنان .

تحية : لماذا تلقي نكاتك على المسرح ؟

اسماعيل لان النكتة البريئة الحلوة تؤثر في الجمهور اكثر من رواية كاملة يمثلها فطاحل الممثلين , ولا ننسى ان الشعبالمصري ابن نكتة .

تحية : ما هي احسن نكتة قلتها ؟

اسماعيل (وكانه تلميذ امام ممتحن قاس) اثنين ستات ماشين في السكة ..فقابلهم واحد افندي …فسلم بحراة على واحدة منهم وسالها عن صحتها وحالها . وبعد ما مشى سالتها صاحبتها :(انتي تعرفي الافندي اللي سلمم عليكي باشتياق قوي ؟) فقالت :(ايوه اعرفه معرفة سحية … كنت متجوزاه ثلاث سنين !)

تحية : (تبتسم) مش بطالة 7 من 10 وابوخ نكتة قلتها في حياتك ؟!

اسماعيل – واحد بيه قال للخدام بتاعه : يا محمد صحيني من النوم الساعة خمسة احسن عندي شغل مهم …وبعدين البيه صحي من النوم لوحده ووجد الساعة سابعة فثار ونادى الخدام وقال له :(انا يا محمد مش قلتلك صحيني الساعة 5؟) فالخدام قال له :(ايوه يا بيه..ولكن جيت اصحيك لقيتك نايم!)

تحية : (تغرق في الضحك وتخرج من جيبها قرش تعرييفة وتعطيه لاسماعيل تقديرا له لهذه النكتة) دي احسن نكتة ..وتكتفي بذلك  وتقفل ………………………..

 نشر هذا الحوار في مجلة الكواكب العدد48-يوليه -1952 / من ارشيف رئيس التحرير

المشاركات والتعليقات المنشورة بأسماء مستعارة لاتمثل الرأي الرسمي لصحيفتنا ( المواطن اليوم ) بل تمثل وجهة نظر كاتبها

اترك تعليق على الخبر