تم النشر في الأربعاء, 3 سبتمبر 2014 , 11:24 مساءً .. في الأقسام : أهم الأخبار , تحقيقات

صحيفة المصرى اليوم» تنشر نص اعترافات المتهم بتعذيب «أيتام مكة المكرمة»

 

متابعة المواكن اليوم

نشرت صحيفة المصري اليوم اعترافات صاحب دار مكه المكرمة الخيرية  . نعيد نشرها في المواطن اليوم . ليطلع عليها قرائ ( المواطن اليوم ) 

 اعترافات المتهم أسامة محمد عثمان، صاحب دار مكة المكرمة الخيرية، بتعذيب الأطفال نزلاء الدار، وأقر المتهم بجريمته خلال تحقيقات نيابة حوادث جنوب الجيزة، برئاسة المستشار أسامة حنفى، تحت إشراف المستشار ياسر التلاوى، المحامى العام الأول لنيابات جنوب الجيزة، وقال صاحب أشهر فيديو تداول على مواقع التواصل الاجتماعى خلال الآونة الأخيرة، إنه تعرض لمؤامرة من قبل زوجته التى اتهمها بالزنى فى محاضر رسمية، وأكد أن الزوجة «إلهام» قامت بتصويره لابتزازه بالفيديوهات وسرقت منه مبالغ مالية كبيرة.وأضاف منشئ دار الأيتام المشهرة برقم 2760 تحت إشراف وزارة التضامن الاجتماعى بالعقار رقم 158 بشارع العريش بالهرم، أنه كان يعتدى على الأطفال بالضرب والركل بـ«الشلوت» أسبوعيًا بغرض تهذيب سلوكهم، لكنه عاد وأنكر تسببه لما بهم من إصابات بدت مع تحقيقات النيابة العامة، مؤكدًا أن «إلهام» لقنت العيال دول الكلام دا علشان تتنقم منه.

س: ما اسمك وعنوانك؟

ج: اسمى/ أسامة محمد عثمان محمود 50 سنة، رئيس مجلس إدارة جمعية مكة المكرمة للأيتام الكائنة 158 شارع العريش من شارع الهرم وأحمل بطاقة رقم قومى 26505190102516 ومقيم بالعنوان 8 شارع الإسلام متفرع من شارع الشهيد أحمد حمدى الطوابق فيصل.

س: ما هى تفصيلات اعترافك؟

ج: أنا كنت شغال مدرب رياضى وتزوجت من السيدة إلهام عيد عوض وسافرت منذ سنة 91 إلى السعودية وفضلت شغال هناك وهى سافرت معايا هناك السعودية وعملت فلوس حلوة لأنى كنت هناك شغال مدرب رياضى فى الخطوط السعودية وفى عام 2006 فتحت جمعية خيرية ودار أيتام واسمها جمعية ودار أيتام مكة المكرمة بالهرم وكان عنوانها 158 شارع الهرم بالدور الرابع ناحية شارع العريش وكان ساعتها المسؤول عن الدار سيده اسمها نجاح وفى عام 2008 زوجتى رجعت مصر اللى هى إلهام علشان ولادى يكملوا التعليم فى مصر لكن هى أهملتهم بسبب أنها كانت بتروح الدار وبتطول فيها فى الوقت وفى عام 2009 قررت الرجوع إلى مصر علشان حسيت إن مراتى مش تعرف تربى أولادى ولما رجعيت لقيت فى الدار عشرين طفل وطفلة أعمارهم من عمر يوم إلى عمر سنة وعملت تشطيب وغيرتها ودهنت الدار وغيرت الستاير بتاعة الدار وكان فى مديرة مسئولة عن الدار بس مش فاكر اسمها إيه وكانت زوجتى بتيجى الدار كل أسبوع مرة أو اثنتين علشان تجيب تبرعات للدار وكان بيتردد علينا أطفال نستلمهم عن طريق الوزارة حتى استقر معانا ثلاثة عشر طفلا ودول اللى فضلوا بعد تسليم سبع أطفال لدار أيتام نواة الخير ودول أطفال أنا ربيتهم من عمر سنة لغاية ماراحوا دار نوة الخير وهما عندهم ست سنوات وتبقى لدى بالدار اثنا عشر طفلا ودول أنا برضوا اللى مربيهم من عمر عام حتى أكبر واحد منهم اللى هو محمد رمضان وبعد كده جالى طفلة اسمها بسملة فى شهر خمسة اللى فات وبقى عندى إجمالى ثلاثة عشر طفل وكنت باصرف على الدار من حساب الجمعية اللى فى البنك وحساب الجمعية ده بيجى من تبرعات الناس وكمان بأصرف على الجمعية من التبرعات العينية اللى بتيجى من الناس زى الأكل واللبس وأنا كنت باتعامل مع العيال بتوع الدار زى أبوهم وكنت باخاف عليهم بس أنا كنت باضرب العيال لما يغلطوا وهما كانوا أشقياء وكانوا بيغلطوا كتير وبيعلوا فى التليفزيون وكان فيه عندنا تكييفات وكانوا هما بيلعبوا فيها ولما بيعملوا شقاوة زى كده كنت بأضربهم بعصاية خشب عقابًا ليهم والضرب كان جامد شوية بس علشان هما أشقياء وكنت بحاول أربيهم وفى سنة 2013 من حوالى سنة وأربع شهور زوجتى إلهام لما عرفت أنى تزوجت عليها فى يوم من الأيام صورتنى وأنا بضرب العيال الصغيرة ويومها ضربتهم علشان كانوا لعبوا فى التليفزيون والكهرباء وكان يومها أنا ضربتهم جامد بالعصاية والشلوت والأقلام وساعتها كنت بأحاول أعاقبهم علشان خايف يموتوا وإلهام ساومتنى بالفيديو ده علشان متبلغش النيابة وعملت لها محضر فى النيابة بالمساومة بس ماقلتش فيه إنى ضربت العيال وكانت بتأخذ منى فلوس مقابل الفيديو اللى مصوراه ده وبعد كده هى إلهام سرقت منى مبلغ مالى قدره سبعة وأربعون ألف جنيه وذهبت وأنا عملت بيهم محضر وفضلت تساومنى على قصة ضرب العيال ده وفى يوم 31/7/2014 عرفت إنها بتخونى مع واحد اسمه سعيد إسماعيل وده من مكالمة تليفون مجهولة ورحت العنوان اللى أخذته وهو 4 شارع حلوان فى الدور الخامس فى ساحل روض الفرج رحت ولقيت مراتى لابسة قميص النوم الأسود وهو كان لابس بنطلون وفانلة حمالات ورحت عملت محضر بالكلام ده واتخانقت معاه ورقم المحضر 5933/2014 إدارى الساحل وهو تانى يوم على طول خد الفيديو ونزله على النت وعمل بلاغ فى النيابة.

 

س: ما هى صلتك بدار مكة المكرمة للأيتام؟

ج: أنا منشئ الدار ديه وصاحبها ورئيس مجلس الإدارة منذ عام 2006

س: ما سبب إنشاء تلك الدار؟

ج: أنا قلت أعمل عمل خير علشان اليتامى.

س: ما هى كيفية إنشاء تلك الدار؟

ج: أنا أجرت شقة واشتريت أنتريه ومطبخ وسراير وفرشت الشقة وجهرتها ورحت قدمت الورق فى الوزارة.

 س: ما هى المستندات التى قمت بتقديمها؟

ج: أنا عملت عقد إيجار الشقة باسم الجمعية وأنا المسئول عنها وجه ناس من التخطيط الهندسى والمطافى وقمنا بجمع هذه المستندات وتقديمها إلى إدارة الأسرة والطفولة بالعجوزة وبعد كده جت لجنة من اثنين موظفين وعملت معاينة للدار وخدت موافقة شفوية وبعد كده استلمت الترخيص الرسمى للدار.

س: ما هى كيفية تسجيل الأطفال بالدار لديك؟

ج: إحنا بنأخد الطفل من القسم وتبقى وسيلة الاتصال دائمة بالقسم فى حالة وجود طفل لقيط بعد كده أروح القسم عن طريق موظفة عندى معاها تفويض من الدار وخطاب من الدار لاستلام الطفل ويكون معاها الإشهار بتاع الدار ويعملوا محضر بسن الطفل ولبسه والعلامات المميزة اللى فيه وبعد كده نروح النيابة علشان نأخذ قرار إيداع الطفل لدار مكة المكرمة وبعد كده نرجع القسم علشان نعمل ثلاثة محاضر واحد منها للصحة والثانى لينا والثالث للوزارة وبعد كده الطفل يبقى مسئول مننا مسئولية كاملة.

س: ما هو العدد المتاح لديك فى تسجيل وإيداع الأطفال بالدار لديكم؟

ج: العدد المعروف لى هو عشرون طفلة وطفل مجهولى النسب.

س: كم عدد الأطفال لديك الآن؟

ج: أنا كان عندى تسعة عشر طفلا مشيوا منهم سبعة من حوالى تسع شهور راحوا لدار أيتام نواة الخير وبعد كده جه على الدار طفلة اسمها بسملة فى شهر خمسة بقى عندى ثلاثة عشر طفلا وطفلة.

س: ما هى أسماء وأعمار سالفى الذكر؟

ج: هى الأسماء بسملة وعمرها حوالى سنة وشهور ونورا عمرها أربع سنين وإلهام خمس سنين وهدى تسع سنوات وداليا تسع سنوات وشهد عمرها عشر سنين وشيماء وعمرها خمس سنين وهيثم وعمره سبع سنين وياسر عمره ثمانية سنوات ومحمد وعمره أحد عشر عامًا وهنادى عمرها خمس سنوات ومشيرة عندها ست سنوات ودنيا عمرها ثمانى سنوات

س: ماعلاقتك بسالفى الذكر؟

ج: أنا كنت بأعامل الولاد دول زى ولادى بس أنا كنت بأضربهم علشان قصدى أنى أربيهم.

 س: ما هى كيفية الإنفاق على الأطفال سالفى الذكر؟

ج: عن طريق حساب الجمعية اللى فى بنك مصر لأنى أى حد بيتبرع ويجيب فلوس آخر الأسبوع نعمل إيداع للفلوس دى فى البنك وبصفتى المسئول عن الجمعية بطلع الشيكات باسم الموظفات وأبعت تفويضى من الجمعية معهم على قد المبلغ اللى الجمعية تحتاجه وبيجى تبرعات عينية من ملابس وأطعمة للأطفال وأنا بأديها ليهم.

 

س: ما مدى وجود مصادر دخل أخرى للجمعية؟

ج: لا هو الحساب بس بتاع الجمعية.

س: ما مدى وجود ثمة أشخاص يقومون بتمويل الدار بتبرعات عينية أو مادية بصفة دائمة؟

ج: فى ناس مثبتة مبلغ كل شهر بتيجى الدار علشان التبرع وفى ناس بتيجى لى مباشرة وبالنسبة للأكل بتيجى وجبات ثابتة زى المنوفى الكبابجى وألبان المالكى وغيرهم.

س: ما هى كيفية علمك باحتياجات ونفقات الأطفال الخاصة؟

ج: هى المديرة المسئولة عن الدار بتكتب طلب شراء بالحاجة اللى عاوزينها فى الدار وتوقع عليه وكمان المشرفة متباعة الدار وأنا بأوقع عليه وبعد ما تشترى الحاجات المطلوبة توقع على استلام الحاجات وده بيكون بناء على شيك.

س: ما هى كيفية إطعام الأطفال ومصادر تلك الأطعمة؟

ج: هو بالنسبة للعيش بيجى تبرع وبالنسبة للفول والبيض أما بيجى تبرع أو بشتريه بفواتير ومن مصادر أخرى للأطعمة وهى زى ما قتل قبل كده محل الماكلى وحضرت موت ودا بيقى بإيصالات تسلم واستلام.

س: ماهى كيفية رعايتك لتلك الأطفال

ج: هما الصبح بيأخدوا دوش وبعد كده يفطروا وبعد كده يقعدوا على السفره وبعد كده بتيجى المشرفة الإخصائية تيجى تديهم أحاديث نبوية وبعد كده يتفرجوا على الكرتون وبعد كده يعملوا الواجب والواجب ده يومى والساعة اثنين يبقى ميعاد الغداء وبعد الغداء بيكون فيه حاجة حلوة ودة بيقى الساعة الخامسة مساء والثامنة مساء بيكون العشاء ويوم الخميس بيأكلوا كشرى وبيناموا التاسعة مساء.

س: من يساعدك فى إدارة تلك الدار؟

ج: هو اللى بيساعدنى مديرة الدار وهى منى محمد المسئولة من الساعة التاسعة صباحًا وحتى الساعة التاسعة مساء وكمان فيه مشرفة مقيمة وهى الإخصائية شيماء وفى مربيات وهما سحر محمد وهدى.

س: ما هى صفة سالفى الذكر بالدار محل الوقعة؟

ج: منى محمد سيد هى مديرة الدار وأنا اللى معينها ومعمول لها عقد والإخصائية اسمها شيماء وبرضوا بعقد.

س: من المختص بتعيين سالفى الذكر؟

ج: أنا اللى باختارهم وأعينهم وأعمل محضر لمجلس الإدارة وأبعته المديرية علشان أقول لهم إن الموظفة اتعينت بمرتب كذا.

س: من هم أعضاء مجلس الإدارة وما هى علاقتهم بالدار؟

ج: أعضاء مجلس الإدارة رئيس مجلس الإدارة وحميدة أحمد حسين أمينة الصندوق وهى والدتى وداليا أحمد كمال وهى عضوة وبتعمل سكرتيرة بالجمعية وسحر عادل محمد ودى أمين عام الجمعية.

س: ماهى مصادر دخل الأطفال وما دور رقابتك عليها؟

ج: فيه دفتر توفير لكل طفل عنده كفيل بيكفله وفى إيصال كفالة والمبلغ اللى بيجى بيتحط فى دفتر توفير الطفل وماليش أى رقابة مالية عليه.

س: ما مدى قدرتك على التعرض فى دفاتر توفير الأطفال؟

ج: أنا مقدرش أصرف حاجة منهم.

س: ما هى الجهة الرقابية المنوط بها رقابة أعمالك؟

ج: وزارة التضامن الاجتماعى وإدارة الأسرة والطفل بالعجوزة والإدارة العامة للأسرة والطفولة وإدارة العمرانية للأسرة والطفل وإدارة الطالبية للأسرة والطفولة.

س: ما مدى وجود ثمة ملاحظات أو شكاوى ضدك

ج: لأ أنا ماجاش ليا أى ملاحظات.

س: ما هو اعتمادك الشخصى على توفير متطلبات تلك المؤسسة وما هى كيفية ذلك؟

ج: أنا باتعامل معهم بناحية اقتصادية وغذائية يعنى باحاول أقتصد من النفقات علشان ألبى ليهم المتطلبات بتاعتهم.

س: متى بدأت فى جمع تبرعات فى تلك المؤسسة؟

ج: منذ عام 2007 وهو فى واحد ثابت معايا بيدينى ألفين دولار

س: ما هى المستندات الرسمية المسلمة إليك لإثبات تلك التبرعات؟

ج: أنا طابع إيصالات باسم الجمعية وأسلم أصل الإيصال للمتبرع وإثبات صورة فى الفتر يفضلوا معايا ولما يجى التفتيش يطلع على أرقام الإيصالات ويعرف أن البيانات سليمة ويكتب تقريره.

س: ما هى الجهات المختصة بذلك؟

ج: هى إدارة الجمعيات والإدارة العامة للأسرة والطفولة.

س: ما هى كيفية قيام الجهات سالفة الذكر بحصر ومراجعة تلك المستندات

ج: هو بيراجع المستندات ورقة ورقة وبيشوف إذا كان فيه طمس لأى بيانات ويراجع الأوراق ويجمع المبالغ بتاعة التبرعات ويراجع حساب البنك علشان يعرف إذا كانت التبرعات دخلت الحساب ولا لأ.

س: ما هى كيفية تعاملك مع أطفال الدار

ج: أنا بأعاملهم زى والدهم ووقت الإجازة بأخرجهم ووقت الغلطة بأعاقبهم.

س: ما هى كيفية معاقبتك للأطفال بالدار؟

ج: أنا اللى بيغلط عندى بأضربه بالعصاية الخشب وبأعمل كده برضه مع أولادى لأنى أنا باخاف عليهم وهو الضرب اللى بيجيب معاهم نتيجة علشان هما أشقياء.

س: ما هى الأخطاء التى يرتكبها هؤلاء الصغار لمعاقبتهم؟

ج: يعنى مرة بنت خرجت عند الأسانسير ضربتها بالعصاية وعلى إيديها وفى مرة طفلة راحت عند البوتوجاز دى أنا برضه ضربتها بالعصاية وبرضه ده أمثلة للى بيغلط.

س: ما هى كيفية تعديك على هؤلاءالأطفال؟

ج: أنا بأضربهم بالعصاية على إيدهم وعلى أرادفهم لما يغلطوا أو بالشلوت والأقلام وأنا مش بأعتدى عليهم بالقدم زى مقاطع فى الفيديو وهو أنا كنت دايما باستخدم معاهم العصاية

س: ما هى كيفية تقبل الأطفال لتلك المعاملة؟

ج: هما دايماً كانوا بيعيطوا ويصرخوا بس أنا كنت بأعمل كده علشان أربيهم. 

س: كم عدد المرات التى قمت فيها بالتعدى على الأطفال؟

ج: أنا بأضربهم بس لما يغلطوا أو يعملوا شقاوة وتقريباً أنا كل أسبوع لما يغلطوا أو يعملوا شقاوة أنا باضربهم.

س: ما هى الأداة المستخدمة فى الاعتداء على الأطفال؟

ج: أنا باضربهم بعصاية خشب بتاعة السرير لما يغلطوا ده تقريباً كل أسبوع

س: ما كيفية تعديك عليهم باستخدام تلك العصا؟

ج: أنا باضربهم على أردافهم ورجلهم وبأبقى ماسكها بإيدى وأنا بأضربهم

س: ما نوع تلك الإصابات بالأطفال نتيجة ذلك التعدى؟

ج: أحياناً ممكن إيدهم تورم.

س: ما مدى مشاهدة أحد من العاملين أو موظفى الدار على تلك الأفعال

ج: لا.

ملحوظة: حيث قمنا بعرض الفيديو المتدوال بوسائل الإعلام ومواقع التواصل الاجتماعى على المتهم الماثل والخاص بتعديه على الأطفال وذلك على جهاز الحاسوب الخاص بنا تمت الملحوظ «وكيل النيابة»

س: ما هى علاقتك بالفيديو المعروض عليك الآن؟

ج: أنا فعلاً ضربت العيال اللى فى الفيديو بس أنا كنت خايف عليهم علشان الكهرباء والتليفزيون اللى فتحوه ووقعوه.

س: ما قولك فيما جاء بكيفية التعدى على الأطفال سالفى الذكر؟

ج: لأ أنا مش كل مرة بأضربهم كده أو برجلى وأضربهم بالعصاية أو بإيدى.

س: ما قولك فيما جاء فى تلك المشاهد وقسوة التعدى على الأطفال؟

 : أنا ماكانش قصدى غير إنى أربى العيال علشان كنت خايف عليهم أحسن يتكهربوا.

س: ما مقصدك من تلك الأفعال

ج: أنا مش قصدى أضربهم أنا قصدى أربيهم.

ملحوظة: حيث قمنا بعرض عدد ثلاثة عشر خشبة تم العثور عليهم بمعرفتنا بدار جمعية مكة المكرمة بداخل مكتب المتهم الماثل تمت الملحوظة «وكيل النيابة»

س: ما علاقتك بالأدوات سالفة العرض عليك؟

ج: هذه العصيان بتوع سراير العيال ودول اللى كنت بأستخدمهم فى ضرب الأطفال لتربيتهم.

س: ما هى علاقتك بالمدعوة إلهام عيد عوض؟

ج: هى مراتى ولكن إحنا شبه منفصلين من حوالى سنة وبينا قضايا ومحاكم.

س: متى نشبت تلك الخلافات؟

ج:من حوالى سنة وشهرين.

س:ما سبب تلك الخلافات؟

ج:علشان هى بتشرب شيشة صبح وليل وهى سرقت الخزنة بتاعتى وعليها قضية سرقة قبل كده.

س: ما ثمرة ذلك الزواج؟

ج: أنا معايا منها ثلاث أولاد هم أحمد ويارا ودالينا.

س: هل تم إثبات تلك الخلافات قائمة فى محاضر رسمية؟

ج: أيوه أنا عامل ليها كذا محضر وهى برضه عملت ليا محضر تمكين من شقة الزوجية وبس مش فاكر أرقام المحاضر.

س: ما قولك فى مناقشة سالفة الذكر بالتحقيقات من قيامك بالتعدى عليها ضربًا حين حاولت منعك من ارتكاب تلك الأفعال ومنعها من دخول الدار؟

ج: لا الكلام دا محلصش.

س: ما قولك فيما أقرت به سالفة الذكر من قيامك بارتكاب العديد من المخالفات المالية وذلك بإثبات أسماء وهمية بكشف الهيكل الوظيفى بالدار وتقاضيك رواتيهم على خلاف الحقيقة (قرأنا عليه الأقوال تفصيلاً)

ج: ده كذب وتوجد لجان تفتيش تتفقد الموظفين بالكشوفات المالية بتاعتهم والعاملين بالدار ورواتبهم.

س:ما قولك فيما قررته المتهمة منى محمد حسين من عدم توقيعها بكشف الهيكل الوظيفى بتقاضيها ثمة راتب عن فترة عملها؟

ج: لا هى موقعة جنب مرتبها أنها أستلمته.

س: ما قولك وقد ثبت بمناظرتك ارتداءك باليد اليمنى خاتم فضى كبير الحجم على نحو ما قرره الأطفال كل من طارق همام عرابى ونور الدين محمود عبد الفتاح وأدهم هانى سعد الدين أنك تعديت عليهم بيدك مستخدمًا ذلك الخاتم

ج: أنا الكلام ده محصلش منى والعيال دول إلهام هى اللى قالت ليهم يقولوا الكلام ده

س: ما قولك فى أن الأطفال سالفى الذكر انقطعت علاقتهم وصلتهم بالمدعوة إلهام وذلك على لسانك بسب تركهم الدار منذ حوالى تسع شهور وأنهم متذكرين وقائع تعديك عليهم مستخدمًا فى ذلك العصا ويدك التى ترتدى بها الخاتم حسبما جاء بمناظرتنا؟

ج: أنا أنكر هذا الاتهام وده اتهام باطل.

س: ما قولك فيما قرره الأطفال جميعًا من انك كنت دائم التعدى عليهم بالضرب؟

ج: هى أكيد الست اللى اسمها إلهام هى اللى حرضت العيال دول على اتهامى بكده.

س: ما هى كيفية ذلك فى حين أن أعمار الأطفال تتراوح ما بين سن الرابعة حتى الأحد عشر عامًا؟

ج: أيوه هى تقدر تعمل كده.

س: ما هى علاقتك بالمدعو سعيد إسماعيل أحمد وهل توجد خلافات سابقة بينكم؟

ج: فيه خلافات معاه وأنا اتهمته فى محضر رسمى بالزنا مع مراتى والمحضر ده عملته لما لقيت مراتى عنده فى البيت اللى فى 4 شارع الحلوانى بساحل روض الفرج رحت عملت محضر ليه فى القسم هناك.

س: ماعلاقتك بالمتهمة منى محمد سيد؟

ج:هى شغالة عندى فى الدار.

س: منذ متى ذلك وما هو اختصاصها الوظيفى؟

ج: شغالها حوالى شهرين وهى مديرة الدار وقبل الشهرين دول كانت متطوعة فى الدار ببلاش.

س: ما قولك فيما قررته سالفة الذكر بالتحقيقات (تلوتها عليه)؟

ج: أنا اللى حصل قلت عليه وأنا مش باضرب العيال غير لما بيغلطوا وبأعاملهم زى أبوهم.

س: ما قولك فيما أثبته مفتش الصحة حال توقيعه على الأطفال نزلاء الدار هدى عاشور وهيثم سيد رياض ودنيا محمد عبدالرحمن وإلهام محمد وداليا ماهر؟

ج: أنا ما أعرفش الإصابات دى سببها إيه لأن العيال دول أشقياء.

ملحوظة: حيث قمنا بعرض مقطعى فيديو مقدم من المدعوة إلهام عيد عوض مدة الأول دقيقة واثنتى عشرة ثانية والثانى دقيقة وتسعة وخمسين ثانية ويظهر منهما أطفال يقومون بالأعمال المنزلية من تنظيف وغسل ملابس وبالثانى قيامك بالتعدى على بعضهم ضربًا «تمت الملحوظة»

س: ما قولك فيما عرض عليك بمقطعى الفيديو؟

ج: ده مؤامرة من زوجتى لأن يوجد مربيات تقوم بالواجبات المنزلية وإلا لماذا تركتهم يعملون مع أنها مسؤولة وأكرر أنها مؤامرة من زوجتى التى قامت بالتصوير.

س: أنت متهم بالتعدى بالضرب على المجنى عليهم كل من محمد رمضان أحمد ودنيا محمد عبدالرحمن وياسر محمود إمام وهيثم سيد رياض وشهد رمضان وهنادى على وهدى عاشور ومشيرة عصام وطارق همام ونور الدين محمود وإحداث إصابتهم باستخدام عصا حال كون المجنى عليهم تحت ولايتك ورعايتك بالنحو المبين بالتحقيقات

ج: أيوه الكلام ده حصل وأنا كنت بأحاول أربيهم وأعاملهم زى أبوهم.

س: أنت متهم بتعريض حياة الأطفال سالفى الذكر للخطر حال كونك مسؤولاً عنهم بدار مكة المكرمة المقيمين فيها على النحو المبين بالتحقيقات؟

ج: أنا ماكنش قصدى أعرض حد للخطر.

س: أنت متهم باستعمال القسوة ضد الأطفال سالفة الذكر حال كونك من المسؤولين عن تربيتهم ورعايتهم؟

ج: الكلام ده ماحصلش

س: أنت متهم بإحراز أداة «عصا» مما تستخدم فى الاعتداء على الأشخاص؟

ج: أنا ماكنتش بأخرج بالعصا دى فى الشارع أنا كنت بأضرب بيها فى الدار بس.

س: هل لديك أقوال أخرى؟

تمت أقواله وتوقع منه على ذلك.

المشاركات والتعليقات المنشورة بأسماء مستعارة لاتمثل الرأي الرسمي لصحيفتنا ( المواطن اليوم ) بل تمثل وجهة نظر كاتبها

اترك تعليق على الخبر